El Correo egunkariko “¿Cuánto
comemos los vascos?” izeneko artikulutik aterata dago honako sarrera hau.
Beharbada, elikadurari buruzko hain artikulu zabal batek ez du zentzu
handiegirik adinekoei buruzko blog batean, baina ziur gaude zertzelada batzuk
izateko baliagarria izango dela.
Lehenik eta behin, esaten da Euskal Herria eta gastronomia oso lotuta
daudela eta artikulu hau baliatuko dugu jakiteko nola jaten duten EAEko
adinekoek. Esan behar da artikulu hau MERCASA erakunde publikoaren 2015eko
txostenean dagoela oinarrituta.
Horrela, esaten da Euskal Autonomia Erkidegoko biztanleek estatuko
batazbestekoaren gainetik jaten dituztela, esaterako, frutak, arraultzak,
arraina, ardoa eta esnea. Bestalde, behar baino gutxiago hartzen ditugu
barazkiak eta ur minerala (gure uraren kalitateak badu eragina, adituen ustez).
Laburbilduz, erkidegoko biztanleek dieta mediterranearraren antzeko zerbait
hartzen dugu, gure bereizgarri batzuk gehituta. Bereizgarri horietako bat da,
adibidez, haragi gehiegi jaten dugula eta bestea, berriz, razioak jaitsi eta
10.000 pausu ematea falta zaigula.
Baina dena ez da txarra, izan ere, Euskal Herrian berezkoa omen da bertako
janariaren aldeko hautua eta otorduak modu osasuntsu eta tradizionalean
prestatzeko ohitura.
Horretaz aparte, otorduek hemen duten izaera sakratua eta soziala
azpimarratzen dute txostenean.
Mokadu osasuntsuak bizitza osasungarri baten alde!
iruzkinik ez:
Argitaratu iruzkina